UKA 2001/14

 

Oqaaseqaatit nalinginnaasut

Soorlu upernaakkut 2001-imi ataatsimiinnermi Naalakkersuisut aningaasarsianit akileraarutit pillugit Inatsisartut inatsisaata allanngortinneqarneranik Inatsisartut inatsisissaattut siunnersuummik saqqummiussissutaani takuneqarsinnaasoq Naalakkersuisut siunertarigaat namminersorlutik inuussutissarsiuteqartut taakkulu siunnersortaat sukumiisumik oqaloqatigireernerisa paaseqatigereernerisalu kingorna ukiakkut 2001-imi ataatsimiinnissamut nalikilliliisarnermut malittarisassanut, piginneqatigiiffiit akileraarutaanut aammalu raajanut akitsuummut allannguutissatut siunnersuutinik saqqummiussinissaq.

Tamaattumik Naalakkersuisut aningaasarsianit akileraarutit pillugit Inatsisartut inatsisaata allannguutissaanut siunnersummik saqqummiussipput, tassuunatigullu killiliivigineqanngitsumik nalikilliliisinnaatitaanermut periarfissat atorluarlugit piginneqatigiiffiit akileraarutissaanik siunissami ukiorpannut kinguartitsisinnaaneq killiliivigineqarluni kiisalu aatsitassarsiornermut inatsit aammalu sermip erngullu avammut nioqqutissatut atorneqarnissaat pillugu inatsit naapertorlugit ingerlatseqatigiiffiit kisermaassinissamut akuersissuteqarfineqarsimasunut piginneqatigiiffiit akileraarutaata 30 %-imut appartinneqarnissaanut siunnersuuteqarlutik.

Erseqqissarneqassaaq pigisat suut nalikilliliissutigineqarsinaanerinut apeqqutit aningaasarsianit akileraarutit pillugit inatsisimmi § 17 naapertorlugu nalunaarummi suliarineqarsimasumi aalajangersarneqarsimammata, takuuk akileraartarnermi nalikilliliinerit il.il. pillugit nalunaarut nr. 18, 9. juni 1986-imeersoq, kingusinnerusukkullu allanngortinneqarsimasoq maannamut atuuttoq.

Siunnersuutigineqarpoq killiliivigineqanngitsumik akileraarutitigut nalikilliliisinnaatitaanerit imaalillugit killiliivigineqassasut selskabit il.il. ukioq aningaasarsiorfik 2001 aallarnerfigalugu nalikilliliinerit makku sinnerlugit nalikilliliinikkut ilanngaateqarsinnaassanngitsut:

a. Illuutit atortullu ikkussorneqarsimasut pissarsiarinerini nalingisa ukiumut 5 %-ii.

b. Umiarsuit timmisartullu pissarsiarinerini nalingisa ukiumut 10 %-ii.

c. Pigisat il.il. nalikilliliissutigineqarsinnaasut allat soorlu: ingerlatsinermut atortut, illumi pequtit aammalu pigisanut piffissami killilimmi pisinnaatitaaffinnut akiliutit kiisalu init attartorneqartut allanngortiterneqarnerinut aningaasartuutit imaluunniit atortulersuutinut selskabip inuussutissarsiutigalugu ingerlanneqarnissaanut pisariaqartitat ikkunneqarnerinut aningaasartuutit ukiup aningaasarsiorfiup naanerani nalingisa nalikilliliissutigineqarsinnaasut ukiumut 30 %-ii.

d. Ingerlatsisnermut atortut, pissarsiarinerani nalingi 100.000 koruuniit taakkuluunniit ataallugit naleqarpata 100 %-ii nalikilliissutigineqarsinnaapput.

Immikkoortuni a-miit d-mut taaneqartuni selskabip nammineq aalajangersinnaavaa nalikilliliinissamut periarfissaq tamakkiisumik, ilaannakortumik imaluunniit pigisanik ataasiakkaanik nalikilliliissuteqarniarluni nalikilliliissuteqarniarnaniluunniit. Selskabip immikkoortuni a-miit d-mut nalikilliliissutai aammalu imm. 5 naapertorlugu nalikilliliissutaasinnaasut matuma kingorna nalikilliliissutissanik qaffanneqarsinnaapput selskabip sinneqartoorutai akileraarutissat ilanngaatigitinnagit affaasut amerlagisunik. Selskabip sinneqartoorutai ima paasineqassapput selskabip akileraaruteqaataasussatut isertitai ukiuni siusinnerusuni amigartoorutinik kiisalu iluanaarusiaqartitsinikkut tunniussanik aammalu § 13 a, imm. 2 aamma 5 naapertorlugit nalikilliliissutinik ilanngakkat. Tassa imaappoq § 13 a, imm. 1 oqaaseqatigiit aappaat malillugu nalikilliliinerit ilanngaatigitinnagit aningaasarsiat akileraaruteqaataasussat (sinneqartoorutit affai). Nalikilliliissutissamut ilassutissaq selskabip il.il. nammineq pigisat immikkoortuni a-miit c-mut taaneqartut agguataarsinnaavai.

Nalikilliliisarnermi maleruagassat allanngortinneqarnerisa malitsigissavaat pigisat nalillit ataasiakkat immikkoortunut a-mut aamma b-mut nalunaarusiorneqassammata, aammalu kontomik naatsorsuisoqassammat pigisap nalillup pissarsiarinerani nalinga pitsanngorsaatinullu aningaasartuutaasinnaasunik takussatissalimmik naatsorsuusiorneqartumik aammalu aningaasartuutaasimasut nalikilliliissutaasimasullu naatsorsorneqarneranik takussutissiisumik. Kontomi ukiut tamarluinnaasa ukiup naanerani naatsorsuiffigineqartartussami pigisap nalillip nalikillilerneqarani nalinga ersersinneqartassaaq.

Immikkoortuni a-mi aamma b-mi pigisat nalillit taaneqartut eqqarsaatigissagaanni, nalikilliliinerit pisassapput pigisap pissarsiarinerani nalinganit ukiut tamaasa assigiimmik nalilimmik nalikillilernerisigut - aamma taaneqartartoq assigiiaartumik nalikilliliineq. Apeqqutaanngilaq pigisaq ukiup ingerlanerani pissarsiarineqarsimanera, tassami ukiumi pissarsiffiusumi ukiumi nalikillilerneqarsinnaasut nalikillilerneqarsinnaajuarmata. Pigisap ukiumi tunineqarfiani imaluunniit ukiumi ingerlatseqatigiiffiup ingerlanneqarunnaarfiani taamaattoq nalikilliligassanik nalikilliliisoqarsinnaanngilaq.

Selskabini aningaasaqarniarneq eqqarsaatigissagaanni, pigisanik nalikillilerneqarsinnaasunik imm. a-mi aamma b-mi taaneqartuni tunisisoqassatillugu, siunnersuutigineqarpoq selskabip annerpaamik nalikillilersorsinnaasaasa imm. a-mi aamma b-mi taaneqartut saniatigut § 13 a, imm. 5 naapertorlugu aamma nalikilliliissuteqarsinnaasut pigisamik tunisinerup iluanaarutaatut annertutigisumik. Selskabip maleruagassaq taanna atussagaluarpagu taava nalikilliliissutigineqarsinnaanera § 13 a, imm. 5 naapertorlugu selskabip ingerlatsinerminut sinneqartoorutaanit naatsorsuinermi ilanngaatigineqassagaluarpoq suli nalikillileeqqittoqannginnerani § 13 a, imm. 1 naapertorlugu taannalu selskabip sinneqartoorutaata affarisinnaavaa.

Immikkoortuni c-mi aamma d-mi nalikilliliissutigineqarsinnaasatut taaneqartut eqqarsaatigissagaanni malugeqquneqarpoq maleruagassap imarimmagu pigisat nalillit aningaasartuutaasinnaasullu allat tamarmik imm. a-mi aamma b-ilu taaneqanngitsut, ullumikkullu akileraartarnermi nalikilliliinerit il.il. pillugit Namminersornerullutik Oqartussat nalunaarutaat naapertorlugu nalikillilerneqarsinnaasut. Pigisanut/aningaasartuutinut taakkununnga nalikilliliisinnaanermut killiliinerit nikerartumik nalikilliliisinnaanertut ingerlanneqassapput. Imatut paasillugu tassa selskabit tamakkiisumik pigisami pissarsiarinerisa nalingi tunineqassasuugunik iluanaarutigisinnaasaat imaluunniit pisinnaatitaaffiit il.il. ilanngaatigereerlugit, ukiumut namminerisamik aalajangikkamik 0-imiit 30 procentit akornanni nalikilliliisinnaallutik. Ukiumut nalikilliliissutaasoq taanna tamakkiisumik nalikillilersorneqarsinnaasunit naliusumit ilanngaatigineqassaaq. Nalikilliliineq taamaasilluni annikilliartortumik ingerlanneqalissaaq.

Imaassagaluarpat selskabip ukiumi pissarsiffigisamini pigisaq imm. d-mi taaneqartut nalikillilerusunngikkaa (tassa pigisap nalinga 100.000 kr.-t ataallugit naleqartup) ukiup naanerani nalikillilerneqarsinnaasup sinneruttup nalinganut ilanngunneqassaaq. Pissarsiarineqarnerani naliusup nalikillilerneqanngitsortaa matuma kingorna ukiumi nalikilliliissutigineqarsinnaassunut ilanngunneqassaaq, imm. c-mi maleruagassaq naapertorlugu 30%-i angullugu nalikillilerneqartarsinnaalluni.

Akileraartarnermi Pisortaqarfiup inatsisip atortuulersinneqarnissaa akuersaarneqareerpat akileraarutitigut nalikilliliisarnermut nalunaarummik nutaamik suliaqassamaarpoq soorlu aamma pisortaqarfik nalikilliliisinnaanermut malerugassanut nutaanut aammalu periusissanut ilitsersuusiorniarpoq.

Nalikilliliisinnaanermut killiliinermi eqqugaasutut tassaapput selskabit, fondit aammalu peqatigiiffiit il.il. Inatsisartut aningaasarsianit akileraarutit pillugit inatsisaanni § 1, imm. 3-12-imi taaneqartut.

Siunnersuutigineqarportaaq inuit akileraarutitigut nalikilliliissutigisinnaasaasa annerpaaffissaat inuup namminersorluni inuussutissarsiornermigut isertitaasut amerlatigisunut killiliivigineqarnissaat, taamaaliornikkut inuup inuttut isertitaqaruni, soorlu akissarsianik, soraarnerussutisianik, honorarisianik, nunanit allanit iluanaarutisianik aamma erniatigut isertitanik il.il. taakkua akileraarutitaannik akiliiuarnissaa qulakkeerniarlugu, soorluttaaq ingerlatsinermi amigartoorneq akileraarutitigut nalikilliliinermit tunngaveqarpat, aappaasup ataatsimut akileraartussaaqatigisap isertitaanit ilanngaatigineqarsinnaanatik.

Inissiatut illuutit ilaasa ulloq 1. januar 1998 sioqqullugu pissarsiarineqarsimasut ukiumut 10 %-it angullugit nalikilliliissuteqarfigineqarsinnaaneri pillugit akileraartarnermi nalikilliliinerit il.il. pillugit Namminersornerullutik Oqartussat Nalunaarutaata allanngortinneqarneranik Namminersornerullutik Oqartussat Nalunaarutaanni nr. 27, 6. november 1997-imeersumi § 3-mi malittarisassat atorunnaarsinneqartariaqassapput, taamaasilluni illuutit pineqartut nalikillilerneqarsinnaassallutik malittarissat maanna siunnersuutigineqartut naapertorlugit. Maskiinat, pequtit ingerlatsinermilu atortut illuutini pineqartuniittut maannakkutut nalikilliliissutigineqarsinnaassanngillat.

Siunnersuutigineqarpoq killiliivigineqanngitsumik nalikilliliisinnaanerit killiliivigineqarnissaannut siunnersuut ukioq aningaasarsiorfimmut 2001-imut tamarmut atuutinneqassasoq, tassa imaassalluni malittarisassat nutaat pigisanut nalikilliliissutigineqarsinnaasunut 2001-imi pisiarineqarsimasunut tamanut atuutissalluni, matumani ilanngullugit pigisat nalikilliliissutigineqarsinnaasut siunnersuutip matuma saqqummiunneqarnera sioqqullugu pissarsiarineqarsimasut.

Selskabi nikingasumik ukiumik aningaasarsiorfeqarpat, tamatuminngalu patsiseqartumik ukioq aningaasaarsarsiorfik 2001 ullormi 31. august 2001-imi imaluunniit siusinnerusumi killeqarpat taamaattoq siunnersuutigineqarpoq malittarisassat nutaat ukioq aningaasarsiorfik 2002 aallarnerfigalugu atuutilissasut. Tamanna patsiseqarpoq selskabit inatsimmut siunnersuutip matuma Inatsisartunut saqqummiunneqarnera sioqqullugu ukioq naatsorsuusiorfiat naasimammat. Selskabinut allanut tunngatillugu siunnersuutip matumap augustip qaammataani 2001-imi tamanut saqqummiunneqarnerata kingorna siunnersuut naapertorlugu iliuusissatik namminneq isumagissavaat.

Nalikilliliisinnaanermut periarfissat nalinginnaasumik siunnersuutikkut killiliivigineqarnerat ilutigalugu aningaasarsianit akileraarutit pillugit inatsimmi § 21 b-mi immikkut malittarisassiornissaq pisariaqarunnaarpoq, tassalu amigartoorutit akileraarutitigut nalikilliliinikkut patsiseqartut ukiunut aningaasarsiorfinnut tulliuttunut nuunneqarnerisigut ilanngaateqarsinnaajunnaartoqarmat, taamaattumik siunnersuutigineqarpoq aalajangersagaq atorunnaarsinneqassaoq.

Selskabit uuliasiornermik aatsitassarsiornermillu kiisalu sermimik imermillu avammut nioqqutissiassanik suliaqartut unammilleqatigiissinnaanerat sakkortusarniarlugu siunnersuutigineqarpoq selskabinut taakkununnga piginneqatigiiffiit akileraarutaat 30 %-inut appartinneqassasoq.

Siunnersuut ullormi 5. juli 2001-imi tusarniaassutigalugu nassiussorneqarpoq oqaaseqaateqarnissamullu periarfissiisoqarluni 6. august 2001-imut killilerlugu.

Siunnersuut tusarniaassutigalugu makkununnga nassiunneqarsimavoq: Ineqarnermut, Attaveqarnermut Pilersuinermullu Pisortaqarfimmut, Inuussutissarsiornermut Pisortaqarfimmut, Aatsitassarsiornermut Pisortaqarfimmut, Aningaasaqarnermut Pisortaqarfimmut, KANUKOKA-mut Kalaallit Nunaanni Inuussutissarsiornermut Siunnersuisoqatigiinnut, GrønlandsBanken A/S-imut, Sparbank Vest A/S-imut, Advokat Henrik Heyimut, Advokatfirmaet Wilhelm Malling & Co.-mut, NUNA Advokatinut, Deloitte & Touche-mut, PricewaterhouseCoopers-imut, SIK-mut, KNAPK-mut, Kalaallit Nunaanni Sulisitsisut Peqatigiiffiannut, HST-mut kiisalu APK-mut.

Tusarniaanermi akissutigineqartut kinguneraat siunnersuuteqqaap annertuumik allannguuteqartinneqarneranik pingaartumik periuserineqartussanut tunngassuteqarnerusut, kisiannili killiliivigineqanngitsumik nalikilliliisinnaanerit killiliivigineqarnissaannut siunertaq attatiinnarneqarluni.

Namminersorluni inuussutissarsiuteqartut taakkulu siunnersortaannik oqaloqatigiinnerit kinguneraat Naalakkersuisut siunnersuuteqarumaarmata selskabinut tamanut atuuttussamik piginneqatigiiffiit akileraarutaanik 30 %-imut appartitsinissamut, selskabinut, killiliivigineqanngitsumik nalikilliliisinnaanerit killiliivigineqarneranut malittarisassat siunnersuutigineqartut sunniuteqartitseqataanerat pissutigalugu, akileraarutissat kinguartinneqartut inissiffiginerusinnaasaat anguneqareerpat. Kiisalu Naalakkersuisut upernaakkut 2002-imi nunatsinni akileraartitseriaatsip akitsuuseeriaatsillu nunat assigiinngitsut aalajngersagaannut sanilliussinikkut piginneqatigiiffissuit aningaasarsiaasa akileraaruteqaataasussat naatsorsorneqartarnerannut pissutsit naapertuukkunaarsimasinnaasut aaqqinniarlugit kiisalu iluanaarutisiaqartitsisarnerup qaqugukkut ilanngaatigineqarsinnaanerimut suliaqarnerit aallartisarniassamaarpaat.

Nalilersueqqissareernerup kingorna Naalakkersuisut aalajangerput maannangaaq raajanut akitsuutip aaqqissuuneqarnera annertussusaalu allanngortinneqarnissaannut siunnersuuteqarniaratik. Naalakkersuisulli raajanut akitsuusersueriaatsinik allanik namminersorluni inuussutissarsiuteqartut peqatigalugit misissuisussanik oqaluuserinnittussanillu aallartisaaniarput.

Nalikilliliisarnermut malittarisassat allanngortinneqarnerisa kingunerisaanik naatsorsuutigineqarpoq akileraarutissat akilerneqajaarnerusussat ataatsimut Landskarsimut kommunillu karsiinut ukiumut aningaasaliiffiusumut 2002-imut 30 mio. koruuniussasut, taakkunannga 15 mio. koruunit Landskarsimut nakkartussat, tassaallutillu nunamut tamarmut akileraarutit aammalu Namminersornerullutik Oqartussat selskabiutaasa piginneqatigiiffitut akileraarutaat.

Aatsitassarsiornermut inatsit kiisalu sermip erngullu avammut nioqqutissatut atorneqarnissaat pillugit inatsit naapertorlugit ingerlatseqatigiiffiit kisermaasinissamut akuersissuteqarfigineqarsimasut piginneqatigiiffiit akileraarutaasa "appartinneqarnerat" naatsorsuutigineqanngilaq immikkut taasarialinnik ukiumi aningaasaliiffiusumi kiisalu ukiuni missingersuusiorfiusumi isertitassatigut sunniuteqartitsinissaat.

Siunnersuutit allaffissornikkut sunniutissaat annertunngillat.

 

Aalajangersakkanut ataasiakkaanut oqaaseqaatit

 

§ 1, nr. 1-imut

Selskabit akileraarutitigut nalikilliliisarnerini killiliinissamut siunnersuusiaq ersarissumik nalinginnaasumik oqaaseqaatini eqqartorneqarpoq, tassungalu innersuussissoqassaaq.

Aammattaaq malugeqquneqarpoq akileraartussaatitaasut aalajangersakkami eqqartorneqartut aningaasarsianit akileraarutit pillugit inatsimmi § 1, imm. 1, nr. 3-12-imiittuni taaneqarmata.

Siunnersuut malillugu selskabit pigisanik nalilinnik il.il. nalikillilersorneqarsinnaasunik pigisallit immikkoortunut 3-nut aggorneqarsimapput;

a) Illuutit atortullu ikkussorneqarsimasut.

b) Umiarsuit aamma timmisartut.

c) Pigisat nalikillilerneqarsinnaasut allat aamma aningaasartuutit.

Immiikkoortuni a-mi aamma b-mi kiisalu imm. c-mi pigisat nalillit killilersimaarneqarsinnaasatut taasat akileraartarnermi nalikilliliinerit il.il. pillugit Namminersornerullutik Oqartussat nalunaarutaat naapertorlugu suliarineqassapput.

Aammattaaq akuersaarumaneqarpoq pigisat nalikillilerneqarsinnaasut allat tamakkiisumik nalikillilerneqarsinnaassasut pissarsiarinerata nalinga pigisanut ataasiakkaanut 100.000 kr.-iuppat taakkualuunniit ataappatigit.

Malugeqquneqarportaaq selskabinut Kalaallit Nunaanni atortussiassat aatsitassanit pisut pillugit il.il. inatsimmi selskabillu misissuinissaminnut imaluunniit atuisinnaanissaminnut akuersissuteqartunut atuuttumik, nioqqutissiornermi pigisat nalillit ingerlatsinermut atortutut isigineqarmata. Nioqqutissiornermi pigisat nalillit ingerlatsinermut atortut il.il. tassaapput nioqqutissiorfiit il.il. nunamiittut, sulliviit ikkullugit aalajangikkat aammalu nuunneqarsinnaasut taakkununngalu ingerlatsinermut atortunik aamma maskinanik atortulikkat, ruujorersuit, pumpit, tankit toqqortaasiviusut aamma atortut allat aammalu namminerisamik ineqarfiutigalutik sulliviusinnaasut. Umiarsuit aamma illuutit (assersuutigalugu allaffissornikkut illuutigisat) nioqqutissiornermi pigisatut nalilittut ingerlatsinermi atortutut isigineqanngillat.

 

§ 1, nr. 2-imut

Siunnersuutigineqarpoq inuit akileraarutitigut nalikilliliissutigisinnaasaasa annerpaaffissaat, inuup namminersorluni inuussutissarsiornermigut isertitaasut amerlatigisunut killiliivigineqarnissaat, taamaaliornikkut inuup inuttut isertitaqaruni, soorlu akissarsianik, soraarnerussutisianik, honorarisianik, nunanit allanit iluanaarutisianik aamma erniatigut isertitanik il.il., taakkua akileraarutitaannik akiliiuarnissaa qulakkeerniarlugu.

Namminersorluni inuussutissarsiornerup nalinginnaasumik ilisarnaatigaa, aningaasanik iluanaaruteqarnissaq siunertaralugu nammineq akilikkamik akisussaaffigisamillu suliffeqarfiuteqarneq. Aammattaaq suliffeqarfik aalajangersimakannersumik piffissamilu sivikitsuinnaanngitsumi ingerlanneqartuussaaq, kiisalu suliffeqarfik mikisuararsuaannaassanngilaq. Tamatuma saniatigut akileraartussaatitaasup akissarsiortutut aningaasarsiaqarnera soqutaanngilaq.

 

Namminersorluni inuussutissarsiutaaneranik naliliinermi pingaartinneqartussat tassaasinnaapput,

a) suliakkiisup ilitsersuinerata saniatigut imissummik malinnaaviginnittumit taamaallaat ilitsersorneqarluni aningaasarsisussap suliassat pilersaarusiortarnerai, aquttarnerai, agguataartarnerai nakkutigisarneraalu,

b) suliakkiisup aningaasarsisussamut pisussaaffia imissutigineqartunut ataasiakkaaginnarnut tunngassuteqarnersoq,

c) aningaasarsisussaq imissut taannaannaq pinnagu, aammali tassunga ilutigitillugu allanik sullissisinnaanersoq,

d) aningaasarsisussaq suliassap suliarineqarnissaanut suliakkiisup tungaanut aningaasatigut akisussaanersoq imaluunniit nammineerluni aningaasatigut akisussaaffik tigummineraa,

e) aningaasarsisussaq sulisoqarnersoq aammalu nammineerluni ikiortimik atorfinitsitsisinnaanersoq,

f) akiligassiissuteqartoqarneratigut akissarsisitsisoqartarnersoq, aatsaallu suliaq isumaqatigiissutaareersoq naapertorlugu naammassineqaraangat, immaqalu amigaataasut aaqqinneqareeraangata tamakkiisumik akissarsisoqartarnersoq,

g) aningaasarsiat suliakkiisunit aalajangersimasuinnaanngitsunit pissarsiarineqartarnersut,

h) sinneqartooruteqarnissaq aningaasarsinissamut aalajangiisuunersoq,

i) atortut, maskiinat aamma sannatit assigisaalluunniit aningaasarsisussap nammineq piginerai,

j) suliap suliarinissaanut atortussat tamaasa ilaalluunniit aningaasarsisussamit isumagineqartarnersut,

k) aningaasarsisussaq namminerisamik iniuteqarnersoq, soorlu niuertarfik, sannavik, allaffik, passussisarfik, titartaasarfik il.il., suliallu tamaasa ilaalluunniit tassani suliarineqartarnersut,

l) aningaasarsisussap inuussutissarsiutaa immikkut piginnaatitsissummik, akuersissummik assigisaannillu peqaqqaarluni ingerlatassaanersoq, aammalu aningaasarsisussaq akuersissummik taamaattumik peqarnersoq,

m) aningaasarsisussaq suliassanik aalajangersimasunik suliaqarnissaminut piginnaasaqarnerminik suliaqartarnerminillu takoqqusaarutitigut, allagarsiinertigut allatigulluunniit ilisimatitsisarnersoq,

n) suliap ingerlannerani ajoqusertoqassagaluarpat akisussaaffik aningaasarsisussap isumagisassarineraa.

 

Atorfeqartitaalluni sulineruneranik naliliinermi pingaartinneqartussat tassaasinnaapput:

a) suliap suliarineqarnissaa, aamma nakkutilliineq misissuinerlu, pillugu ilitsersuutit nalinginnaasut erseqqinnerusulluunniit suliakkiisumit aalajangersarneqarsinnaanersut,

b) aningaasarsisussaq ataasiinnarmik taannaannangajammilluunniit suliakkiisoqartarnersoq,

c) suliakkiisup aningaasarsisussallu akornanni ingerlaavartumik sulinissamik isumaqatigiissuteqartoqarsimanersoq,

d) piffissat, aningaasarsisussap suliffissai suliakkiisumit aalajangersarneqarsimanersut,

e) aningaasarsisussaq soraarniuteqarnissamut pisinnaatitaaffeqarnersoq,

f) atorfeqarnerit nalinginnaasut assigalugit akissarsiassat naatsorsorneqartarnersut (nalunaaquttap akunnermusiat, sapaatip akunnermusiat, qaammammusiat, kiffartulussinnarnaveeqqutit, akortimut sulinersiutit il.il.),

g) akissarsiat piffissakkaartumik tunniunneqartarnersut,

h) suliap suliarineqarnerani aningaasartuutit suliakkiisumit akilerneqartarnersut,

i) akissarsiassat ilanngaatissanik ilanngareerlugit amerlanertigut aningaasarsisussamut tunniunneqartarnersut,

j) sulinngiffeqarneq pillugu inatsit, atorfillit pillugit inatsit, sulitilluni ajoqusernissamut sillimmasiisarneq pillugu inatsit aamma suliffinnik isumannaallisaanerit pillugit inatsit atorneqartillugit aningaasarsisussaq akissarsiortutut isigineqarnersoq.

 

Namminersorluni inuussutissarsiuteqarneq aamma atorfeqartitaalluni sulineq pillugit ilisarnaatit taagorneqartut arlaannaalluunniit imminermini aalajangiisuunngilaq. Aammattaaq pisut eqqartorneqartut pisuni tamani assigiimmik pingaaruteqanngillat.

Piviusumi imaassinnaavoq suliakkiisup aningaasarsisussallu akornanni pissutsit ilaat atorfeqartitaanertut taaneqarsinnaasut, allallu namminersorluni inuussutissarsiuteqarnertut taaneqarsinnaallutik. Taamaattoqartillugu ataatsimut naliliineq tunngavigalugu aalajangiisoqartassaaq.

Aningaasarsisussap suliakkiisullu ataasiakkat akornanni pissutsit tassaapput naliliivigineqartussat. Suliakkiisut arlaqarpata aningaasarsisussaq namminersorluni inuussutissarsiuteqartutut akissarsiortutullu ataatsikkut aningaasarsiaqarsinnaavoq. Pissutsilli ataasiakkaat nalilerneqarneranni pingaartinneqarsinnaavoq, aningaasarsisussaq inuussutissarsiutimi iluani namminersortutut ingerlataqartuunersoq.

Tamatigut erseqqilluinnartumik aalajangerneqarsinnaanngilaq erniatigut aningaasartuutaasimasinnaasut inuussutissarsiorluni ingerlatamik aningaasalersuinermut imaluunniit namminerisamik atuinermik aningaasalersuinermut attuumassuteqarnersut.

Assersuutigalugu akileraartussaatitaasoq namminerisamik illutaarsimappat, ilutigitillugulu aningaasanik attartugaqarsimappat, taava ilimagineqarsinnaavoq attartukkat namminerisamik illup aningaasaliiffigineranut atugaasimanissaat, aatsaalli akileraartussaatitaasup attartukkami inuussutissarsiutigalugu suliffeqarfiutimi ingerlanneranut imaluunniit pigisanik ingerlatsinermi atorneqartussanik pisinermut atorneqarsimanerat takussutissaqartinngippagu.

Suliffeqarfiup ingerlatsinermut kontuatigut atukkat akileraartussaatitaasup qaffatsissimappagit, paarlattuanik ilimagineqarsinnaavoq atukkat qaffassutaat inuussutissarsiutigalugu suliffeqarfiup ingerlanneranut imaluunniit pigisanik ingerlatsinermi atorneqartussanik pisinermut atorneqarsimanissaat, aatsaalli uppernarsarneqarsinnaanngippat atukkat qaffassutaat soorlu umiatsiamik nuannaariummik pisinermut atorsimagai.

Akileraarutitigut nalikilliliisinnaanermik killiliiviginninnermik pissuteqartumik inuup aningaasarsiai akileraaruteqaataasussat qaffanneqarpata, nalikilliliinerit taakku nalikilliliisimanertut isigineqassanngillat, taamaattumillu ukiuni tulliuttuni nalikilliliissutigineqarsinnaassallutik, aatsaalli tamatumunnga piumasaqaatit atuuppata.

Akileraarutitigut nalikilliliissutaavallaarsimasut pigisanut nalikillilerneqarsinnaasunut ataasiakkaanut, pigisat nalikillilerneqarsinnaasut ilaannut ataatsimoortunut imaluunniit pigisanut nalikillilerneqarsinnaasunut tamarmiusunut agguataarlugit inuup nammineerluni utertissinnaavai.

Akileraarutitigut nalikilliliisarnermik killiliiviginninneq pillugu maleruagassatut siunnersuutit kingunerisaannik, inuup aningaasarsiaasa akileraaruteqaataasussat naatsorsorneranni akileraartarnermi maleruagassat allat allannguuteqanngillat.

 

§ 1, nr. 3-mut

Maleruagassaq § 21 b-imiittoq amigartoorutit akileraarutitigut nalikilliliisimanermit tunngaveqartut aningaasarsianit akileraaruteqaataasussanit ukiuni aningaasarsiorfiusuni tulliuttuni ilanngaatigineqarsinnaannginneri siunnersuutigineqartumi akileraarutitigut nalikilliliisarnermi killiliinerup sunniuteqaatissaanut illuatungiliinavianngilaq, siunnersuutigineqartullu akileraarutitigut nalikilliliisinnaanermut killiliinerit sunniuteqaleriartorneri malittaralugit maleruagassaq atorunnaarsikkiartorneqassasoq siunnersuutigineqarpoq.

 

§ 1, nr. 4-mut

Siunnersuutigineqarpoq ukioq aningaasarsiorfiusoq 2002 aallarnerfigalugu selskabit akileraarutaasa procentiat 35 pct.-imiit 30 pct.-imut appartinneqassasoq, selskabinut Kalaallit Nunaanni atortussiassat aatsitassanit pisut pillugit il.il. inatsit naapertorlugu selskabit misissuinissaminnut imaluunniit atuisinnaanissaminnut akuersissuteqartut, imaluunniit sikumik aamma imermik avammut tuniniaasinnaanermut Inatsisartut inatsisaat naapertorlugu akuersissuteqartut. Atortussiassat aatsitassanit pisut pillugit inatsimmi aammalu sikumik imermillu tuniniaasinnaanermut inatsimmi takuneqarsinnaavoq, selskabit pineqartut taamaallaat inatsimmi pineqartumi aalajangersakkat naapertorlugit suliaqartinneqarsinnaasut selskabinullu allanut ataatsimut akileraaruserneqarsinnaanatik.

 

§ 2-mut

Siunnersuutigineqarpoq inatsisip ulloq 15. november 2001-imiit atuutilernissaa, taamaattorli § 1, nr. 1, 2 aamma 3 ukioq aningaasarsiorfiusoq 2001 aallarnerfigalugu atortuulersillugit, aammalu § 1, nr. 4 aatsaat ukioq aningaasarsiorfiusoq 2002 aallarnerfigalugu atortuulersillugu.

Siunnersuutigineqarporli § 1, imm. 1 selskabinut nikingasumik ukiumik aningaasarsiorfeqartunut, naatsorsuusiorfissaq 31. august 2001-imut siusinnerusumilluunniit killilerneqarsimasunut aatsaat ukiumut aningaasarsiorfimmut 2002-mut atuutilersinneqassasoq.

Maannamut nalikilliliisinnaanermut inatsimmi atuuttuusumi immikkut akileraarutitigut sunniuteqarnavianngilaq akileraarutitigut nalikillilerneqarsinnaasut assigiinngitsuusut ataasiakkaat immikkoortinneqarnerisigut. Maleruagassatut siunnersuutigineqartutut pigisat nalikillilerneqarsinnaasut immikkoortunut 3-nut aggulunniarneqarput tamarmik immikkut nalikillilerneqarsinnaanerminnut naleqartinneqarlutik aamma sivisussusilerneqarlutik. Taamaattumik pisariaqarluinnarpoq selskabit ukiup aningaasarsiorfiusup 2000-ip naanerani pigisat nalikillilerneqarsinnaasut nalingi naatsorsussallugit, inatsimmullu siunnersuutigineqartup maleruagassatut siunnersuutip § 13, imm 2, imm. a-miit imm. c-imut naapertuuttumik naatsorsorneqassallutik, taamaasillutik immikkoortunut aggulutsitsineq ukiumut aningaasarsiorfiusumut 2001-imut selskabit akileraarutitigut nalikillilersinnaasaasa tunngavilersuutitut atorniassammatigik.